24 Цәыббра 2021

АЖӘАБЖЬҚӘА

Аҟәа. Цәыббрамза 22, 2021 шықәса. Аԥсныпресс. Аԥсни Урыстәылеи Жәлар рартистка, К.С. Станиславскии Вл. И. Немировича-Данченкои рыхьӡ зху Москватәи академиатә музыкатә театр асолистка Хьыбла Герзмаа амилаҭтә опертә премиа «Онегин» апрезидентс дҟалеит, ҳәа иаанацҳауеит аопертә шәаҳәаҩы лсаит.

«Сара акыр сазааргон ари апремиа апрезидетс аҟалара, избан акәзар сара сзы апремиа апрезидентра –  ари акыр зҵазкуа, иҷыдоу шьаҿоуп. Апрезидент имч-илшара  аума, ихшыҩ аума, акыр илагала дузароуп ари аус аҿы. Иумоу алшарақәа зегьи уҟыбаҩи алоуҵароуп иара – асцена аҿы аҟазаара инаркны иҿыцу ахьӡқәа ралкааразы алшара  аҟынӡа. Иҿыцу алагалақәа рыдгаларазы агәазыҳәарақәа сымоуп, сара уи аганахьала аусура сазхиоуп.  Сара сусура ахықәкы хаданы избоит апремиа жәларбжьаратәи аимадарақәа рырӷәӷәара, иара убас ҳахәаԥшцәа рыбжьара аҿар рхыԥхьаӡара иаҳа-иаҳа иацло аҟаҵара.  Избан акәзар аопера- ари амода иақәшәо цәырҵроуп», - ҳәа инаҵшьны иазгәалҭеит ашәаҳәаҩы.

Аҟәа. Цәыббрамза 22, 2021 шықәса. Аԥсныпресс. Аԥсны агәабзиарахьчара аминистр Едуард Быҭәба Ареспубликатә иҷыдоу апсихиатриатә хәышәтәырҭа аколлективи анапхгаҩ ҿыци реибадырра мҩаԥигеит.

Амедусбарҭа аҳақьым хада инапынҵақәа налыгӡалоит Ануа Ирина Михаил-иԥҳа. Уаанӡатәи анапхгаҩы Кортаа Гьаргь Игор-иԥа иалеиҵаз арзаҳал ала имаҵураҭыԥ аҟынтәи ихы дақәиҭтәын. 

«Уаанӡа еиԥш уажәгьы, шәара агәабзиарахьчара Аминистрра аҟынтәи иахәҭоу ацхыраара шәоулоит. Шәара шәусура даара акыр аҵанакуеит, шәааи аринахысгьы уи наҳагӡалап.   Аҳәара ҟасҵоит шәнапхгаҩы ҿыц адгылара ишәҭарц. Шәара зегьы Ирина Михаил-иԥҳа зеиӷьаҟам ала дыжәдыруеит, уи аԥышәа змоу усзуҩуп», - ҳәа инаҵшьны иазгәеиҭеит Едуард Быҭәба.

Аҟәа. Цәыббрамза  22, 2021. Аԥсныпресс. Афымцаеихшарҭа «Бзыԥ» аҿы аусура аиԥҟьара ҟалеит, ҳәа иаанацҳауеит Ареспубликатә Унитартә Наплакы «Амшынеиқәафымцамч».

Фымцалашарада иаанхеит Гагра араиони Гәдоуҭа араион ахәҭаки.

Авариа ахьыҟалаз аҭыԥ аҿы аиҭашьақәыргыларатә усурақәа мҩаԥысуеит.

 

 

Аҟәа. Цәыббрамза 22, 2021 шықәса. Аԥсныпресс.  Аҟәа ақалақь асасааирҭа «Аиҭар» иахьаҵанакуа  нанҳәамза 18 инаркны аус зуа арратә мобилтә хәышәтәырҭа Аԥсны аусура аамҭа иалагӡаны арратә ҳақьымцәа 650 –ҩык апациентцәа рыдкылара рылдыршахьеит, ҳәа адырра ҟанаҵоит Алада-Урыстәылатәи арратә Округ апресс-маҵзура. Уажәы ари ахәышәтәырҭа аҿы астационартә хәышәтәра иахысуеит  65 –ҩык апациентцәа. Згәы бзиахахьоу 134-ҩык  инареиҳаны апациентцәа ахәышәтәырҭаҿы иахәҭоу амедицинатә цхыраареи анаҩстәи абжьгарақәеи анроу ашьҭахь илҩааны рыҩныҟақәа рахь идәықәҵахеит. Зегьы  иҩынтәны имҩаԥгаз алаборатортә комплекстә  ҭҵарақәа  рыла ачымазара ҿкы  шрылаҽым еилкаахеит.

Аҟәа. Цәыббрамза 21, 2021 шықәса. Аԥсныпресс. Аԥсны Аҳәынҭқарра Ахада Аслан Бжьаниа Адҵа инапы аҵаиҩит иналукааша аҵарауаҩ, аҳәынҭқарратә усзуҩы Иу. Н. Воронов диижьҭеи 80 шықәса аҵра иазку аиубилеитә усмҩаԥгатәқәа разырхиареи рымҩаԥгареи рзы Аҳәынҭқарратә Комиссиа аԥҵаразы.

Адҵа

Иналукааша аҵарауаҩ, аҳәынҭқарратә усзуҩы, "Ахьӡ-Аԥша" аорден I аҩаӡара занашьоу Иури Николаи-иԥа Воронов диижьҭеи 80 шықәса аҵра иазку аиубилеитә усмҩаԥгатәқәа разырхиареи рымҩаԥгареи хықәкыс иҟаҵаны иаԥҵазааит Аҳәынҭқарратә комиссиа абри аилазаарала:

Гәынба Б. З. – Аԥсны Аҳәынҭқарра Ахада Ихаҭыԥуаҩ - Аҳәынҭқарратә  комиссиа ахантәаҩы;

Ашәба А. Е.- Д.И.Гәлиа ихьӡ зху  Аԥсуаҭҵааратә институт адиректор;

Бӷажәба О.Хә. – Аԥсны Аҭҵаарадыррақәа ракадемиа академик, Д.И.Гәлиа ихьӡ зху  Аԥсуаҭҵааратә институт аҭоурых аҟәша аиҳабы;

Воронова С.В. – Воронов Иу.Н. ихьӡ зху Аҭҵаарадырра-культуратә центр Ахантәаҩы; 

Гәарамиа А.А. – Аԥснытәи аҳәынҭқарратә Университет аректор;

Џьапуа З.Џь. – Аԥсны Аҭҵаарадыррақәа ракадемиа Ахада; 

Џьапуа А.И. – Аԥснытәи аҳәынҭқарратә музеи адиректор;

Сангәлиа Г.А. – Аԥсны Аҳәынҭқарра акультура аминистр ихаҭыԥуаҩ;

Шамба С.М. – Аԥсны Аҳәынҭқарра Ашәарҭадара Ахеилак Амаӡаныҟәгаҩ; 

Ешба Б.Ф. – Аҟәа ақалақь Администрациа ахада.

 

 

 

Аҟәа. Цәыббрамза 21, 2021 шықәса. Аԥсныпресс. Аԥсны Аҳәынҭқарра Ахада Аслан Бжьаниа Аусԥҟа инапы аҵаиҩит  Ажьиба Р.А. "амилициа аинрал-маиор" ҳәа изаамҭанытәиу иҷыдоу ахьӡ ихҵаразы.

Аусԥҟаҟны, ҷыдала, иҳәоуп:

"1996 шықәса ԥхынҷкәынмза 18 аҟн. (УП-13 1997 ш. хәажәкырамза 4 аҟн; 1998 ш. ԥхынгәымза 22 аҟн., УП-62; 2017ш. цәыббрамза 11 аҟн. УП-208 аҧсахрақәа зцу)

Аԥсны  Аҳәынҭқарра Ахада Иусԥҟала ишьақәырӷәӷәоу УП-104 Аԥсны Аҳәынҭқарра аҩныҵҟатәи аусқәа русбарҭақәа рыҟны Аԥҟара инақәыршәаны,

амилициа аполковник, Аԥсны Аҳәынҭқарра аҩныҵҟатәи аусқәа рминистр актәи ихаҭыԥуаҩ, акриминалтә милициа аиҳабы Ажьиба Александр Руслан-иԥа ихҵазааит "амилициа аинрал-маиор" ҳәа изаамҭанытәиу иҷыдоу ахьӡ".

 

 

Аҟәа. Цәыббрамза 20, 2021 шықәса. Аԥсныпресс.  Иахьа, цәыббрамза 21, асааҭ  15:00 инаркны  18:00 рҟынӡа аиҭашьақәыргыларатә усурақәа рымҩаԥагара иахҟьаны, афымцаехшарҭа  «Бзыбь-220» аҟны афымцамч аҿыххоит.

Иарбоу афымцаеихшарҭа аҟны амчхара атрансформаторқәа ОРУ-220 ала аԥсахра мҩаԥгахоит. Аиҭашьақәыргыларатә усурақәа мҩаԥыслоит звольҳараку афымцаҩангага (220 В)  «Бзыԥ» аҟны.  Фымцалашарада иаанхоит Гагра араиони Гәдоуҭа араион ахәҭаки.

Ахаша,  цәыббрамза 22 рзы, аиҭашьақәыргылара-профилактикатә усурақәа рымҩаԥгара инамаданы,   асааҭ 11:00 инаркны 15:00 аҟынӡа афымцаеихшарҭақәа «Барӷьаб», «Отобаиа» афымцалашара аҟынтәи иаҿыххоит.  Аспециалистцәа атрансформаторқәа ирҭоу амасла аԥсахреи абруԥагәатә еибаркреи рҭагылазаашьа агәаҭареи мҩаԥыргараны иҟоуп, ҳәа иаанацҳауеит Ареспубликатә Унитартә Наплакы «Амшынеиқәафымцамч».

 

Аҟәа. Цәыббрамза 21, 2021 шықәса. Аԥсныпресс. Москва ақалақь аҿы алагалатә ҳазылхратә баџь алхрада Урыстәылантәи Аԥсныҟа иаарго анефтаалыҵқәа ршәагаақәа аизырҳара азы Апкаанҵа анапаҵыҩра мҩаԥысит.  Абри азы адырра ҟанаҵоит Аԥсны аекономика Аминистрра апресс- маҵзура.

Апкаанҵа инақәыршәаны, Урыстәылатәи Афедерациа аенергетика Аминистрра, Урыстәылатәи Афедерациа аекономикатә ҿиара Аминистрреи Аԥсны аекономика Аминистрреи 2021 шықәса азы аквота ҿыцқәа алыркааит.

 

Аҟәа. Цәыббрамза 21, 2021 шықәса. Аԥсныпресс. Аслан Бжьаниа аҩаша, цәыббрамза 21 рзы имҩаԥысыз апресс-конференциа аҿы  аҳәаақәа рделиитациеи рдемаркациеи рзы аҩганктәи жәларбжьаратәи акомиссиа аусура атәы еиҭеиҳәеит.

Ажурналистцәа  ааигәа зеилатәара мҩаԥысыз аҳәаақәа рделимитациеи рдемаркациеи рзы аҩганктәи жәларбжьаратәи акомиссиа аусуреи аҳәаа иаԥну ақыҭа Аибӷа аԥеиԥши рзы акыр азҿлымҳара аадырԥшит.

Аҳәынҭқарра Ахада, акомиссиа аус ауеижьҭеи акрааҵуеит, уи аусура аринахысгьы иацҵахоит  ҳәа иазгәеиҭеит. Уи иажәақәа рыла, аҳәаақәа рдемаркациа мрагыларантәи мраҭашәарахь ирханы имҩаԥысуеит, Аибӷа ақыҭа азҵаара аҟынӡа макьана имнеиӡацт. 

Аҟәа. Цәыббрамза 21, 2021 шықәса. Аԥсныпресс. Аԥсни Урыстәылеи ҩбаны иҟоу атәылауаҩра азы Аиқәшаҳаҭра рыбжьарҵоит ҳәа имҩаԥысыз апресс-конференциа аҿы иҳәеит Аҳәынҭқарра Ахада Аслан Бжьаниа.

Аиқәшаҳаҭра Аԥсны атәылауаа рыла Урыстәыла атәылауаҩра роура апроцедура армариараны иҟоуп.

Аԥсуа ган Урыстәыла ақәшаҳаҭразы Аԥсны атәылауаа рыла Урыстәыла атәылауаҩра раиура апроцедура армариара азы Аиқәшаҳаҭра апроект азнархиахьеит. Аҳәынҭқарра Ахада Аслан Бжьаниа Аԥсни Урыстәылеи ҩбаны иҟоу атәылауаҩра азы Аиқәшаҳаҭра анапаҵыҩра азы Ақәҵара нанҳәамза 25 рзы инапы аҵаҩны урыстәылатәи аган ахь ишьҭит. Ари азҵаара аӡбара шықәсык иалагӡаны иалыршахеит.

ПАРЛАМЕНТ-НАРОДНОЕ СОБРАНИЕ РА<br>Официальный сайт
АГЕНТСТВО ПРАВИТЕЛЬСТВЕННОЙ СВЯЗИ РА<br>Официальный сайт
АДМИНИСТРАЦИЯ ПРЕЗИДЕНТА РЕСПУБЛИКИ АБХАЗИЯ<br>Официальный сайт
МЧС РЕСПУБЛИКИ АБХАЗИЯ<br>Официальный сайт
КАБИНЕТ МИНИСТРОВ РЕСПУБЛИКИ АБХАЗИЯ<br>Официальный сайт
МИНЗДРАВ РЕСПУБЛИКИ АБХАЗИЯ<br>Официальный сайт
МИНИСТЕРСТВО ИНОСТРАННЫХ ДЕЛ РЕСПУБЛИКИ АБХАЗИЯ<br>Официальный сайт
ГЕНЕРАЛЬНАЯ ПРОКУРАТУРА РЕСПУБЛИКИ АБХАЗИЯ<br>Официальный сайт
АКАДЕМИЯ НАУК АБХАЗИИ ГОСУДАРСТВЕННОЕ НАУЧНОЕ УЧРЕЖДЕНИЕ «СУХУМСКИЙ ФИЗИКО – ТЕХНИЧЕСКИЙ ИНСТИТУТ»
СУХУМ<br>Официальный сайт
МВД РЕСПУБЛИКИ АБХАЗИЯ<br>Официальный сайт
AUSURA.SU<br>Биржа труда
Яндекс.Метрика

Login to your account

Username *
Password *
Remember Me