АЖӘАБЖЬҚӘА

Аҟәа. Жьҭаарамза 15, 2021 шықәса. Аԥсныпресс. Гагра ақалақь аӡымҽхак иахьаҵанакуа аӡы иагаз ҩыџьа ауаа рхаҭара шьақәыргылахеит.  Урҭ Липецк ақалақь инхоз, 1957 шықәса рзы ииз Золотариов Иури Михаил-иԥеи  1953 шықәса рзы ииз Стоиакина Галина Николаи-иԥҳаи роуп, - ҳәа адырра ҟанаҵоит Аԥсны иҷыдоу аҭагылазаашьақәа рзы Аминистрра апресс-маҵзура.

Аҟәа. Жьҭаарамза 15, 2021 шықәса. Аԥсныпресс. Аҟәа ақалақь аҿы аԥыза-министр Алеқсандр Анқәаб ихантәаҩрала Аԥсны ауааԥсыра акоронавирустә ҿкы чымазара COVID-19 рацәыхьчара азы Акоординациатә Штаб аилатәара мҩаԥысуеит.

“Аҭагылазаашьа ԥыҭк аҭышәынтәалара ашьҭахь, ҳара ҩаԥхьа ачымазара злаҽыз рхыԥхьаӡара аиҳахара аабоит.  Аҭагылазаашьа агәҭынчымра узцәырнамгар залшом, убри инамаданы ҳара ҳаизеит иахьа», - ҳәа Акоординациатә Штаб аилатәара аартуа иҳәеит Алеқсандр Анқәаб.

Атәыла агәабзиарахьчара аминистр Едуард Быҭәба асанитар-епидемиологиатә ҭагылазаашьа аицәахара ирҵабыргит.

«Ареспублика аҿы акоронавирустә ҿкы чымазара алаҵәара инамаданы ишьақәгылаз аҭагылазаашьа есааира еицәахоит, уахыки-ҽнаки рыла иҳауо адыррақәа инарықәыршәны, ачымазара злаҽуа ауаа рхыԥхьаӡара еиҳахоит, жьҭаарамза 12 рзы уахыки ҽнаки рыла ачымазара злаҽыз рхыԥхьаӡара ала антирекорд ықәыргылоуп. Уи  - 235-ҩык рҟынӡа инаӡоит. Акоронавирустә ҿкы чымазара злаҽыз ауаа рҟынтәи 85-90% аштамм «Дельта» рылаҽуп»,-ҳәа инаҵшьны иазгәеиҭеит иара.

Аҟәа. Жьҭаарамза 15, 2021 шықәса. Аԥсныпресс. Аԥыза-министр Алеқсандр Анқәаб ихантәаҩрала, Аԥсны агәабзиарахьчара аминистр Едуард Быҭәба, аҵарадырреи абызшәатә политикеи рминистр Инал Габлиа, Аҟәа ақалақь ахада Баслан Ешба, асанитартә ҳақьым хада ихаҭыԥуаҩ Асҭана Аҩӡба алархәны имҩаԥгаз  аусуратә еилатәара аихшьаалақәа рыла ареспублика ашколқәа рҿы аҵаратә процесс ацҵара азы аӡбамҭа рыдыркылеит.

Ашколқәа рҿы аусура арежим аԥсахра азы аӡбамҭақәа рыдыркылалоит аҭыԥқәа аепидемиологиатә ҭагылазаашьа ҳасаб азуны.  Уи иаанаго иааизакны ашкол аҿы, мамзаргьы хазы игоу аклассқәа рҿы акарантин алагалара ауп.

Аҟәа. Жьҭаарамза 14, 2021 шықәса. Аԥсныпресс.  Иҳаҩсыз уахыки-ҽнаки рыла акоронавирустә ҿкы чымазара азы агәаҭара иахысит 648-ҩык, COVID-19 азы адиагноз 171-ҩык рҿы  ишьақәыргылоуп, ҳәа адырра ҟанаҵоит ауааԥсыра акоронавирустә ҿкы чымазара рацәыхьчара азы Аоперативтә Штаб.

Гәдоуҭатәи араионтә хәышәтәырҭа Хада  аҿы ишьҭоуп 91 – ҩык апациентцәа, 38-ҩык ргәабзиара аҭагылазаашьа акыр иуадаҩуп, 46 -ҩык апациентцәа рҭагылазаашьа бжьаратәуп.

Аҟәатәи аинфекциатә хәышәтәырҭа аҿы ишьҭоуп 41-ҩык апациентцәа, 12-ҩык ргәабзиара аҭагылазаашьа акыр иуадаҩуп, Очамчыратәи араионтә хәышәтәырҭа Хада аҿы – 19-ҩык, Гагратәи араионтә хәышәтәырҭа Хада аҿы – 32, 4-ҩык, ргәабзиара аҭагылазаашьа акыр иуадаҩуп, Ҭҟәарчалтәи араионтә хәышәтәырҭа Хада аҿы ишьҭоуп – 15  - ҩык апациентцәа. Аҟәа ақалақь аҿы аус зуа Урыстәылатәи арратә хәышәтәырҭа аҿы ишьҭоуп 95 -ҩык апациентцәа, урҭ рахьынтә  12–ҩык ргәабзиара аҭагылазаашьа акыр иуадаҩуп.

Аҟәа. Жьҭаарамза 14, 2021 шықәса. Аԥсныпресс.  Жьҭаарамза 14, 2021 шықәса рзы Аԥсны Аҳәынҭқарра Иреиҳаӡоу аӡбарҭа аҿы Жәлар Реизара-Апарламент адепутатцәа Гарри Кокаиеи Алмасхан Арӡынбеи рхымҩаԥгашьа аҿы ацәгьоура аҟазшьақәа амазаара ашьақәыргылара азы аус ахәаԥшра  иалагеит, ҳәа иаанацҳауеит Иреиҳаӡоу аӡбарҭа апресс-маҵзура.

Иреиҳаӡоу Аӡбарҭа аофициалтә саит иҟанаҵо адыррақәа рыла, апрокурор Хада иҟынтәи иааз адырранҵа инақәыршәаны,  Алмасхан Арӡынбеи Гарри Кокаиеи рхымҩаԥгашьа аҿы Аԥсны Ашьаустә Закәанеидкыла ахәҭаҷ 207 ахәҭа 1 (Амбжьахра, абџьар ахархәарала ауаажәларратә ҭышәынтәалара аилагара), иара убас ахәҭаҷ  321, ахәҭа 1 (Амчра ахаҭарнак ихьӡ аларҟәра (ишакум изныҟәара), ахәҭаҷ 217, ахәҭа 1 (иҭҟьо абџьар изакәанымкәа аахәареи аныҟәгареи аҵәахреи) инарықәыршәаны, ацәгьоура аҟазшьақәа аныԥшуеит.

Аҟәа. Жьҭаарамза 14, 2021 шықәса. Аԥсныпресс. «Аиааира 75-шықәса ахыҵра» ҳәа хыс измоу Аԥсны Аҳәынҭқарра Амилаҭтә гәаларшәагатә ԥараҿырпы XV аԥараҿырпқәа жәларбжьаратәи аконкурс  «Аԥараҿырпы еҵәаџьаа»  аҿы «Иреиӷьу асахьаркыратә ӡбамҭа» аноминациа ала аҩбатәи аҭыԥ ааннакылеит.

«Аԥараҿырпы еҵәаџьаа» – ари Урыстәыла имҩаԥысуа жәларбжьаратәи агәаларшәагатә ԥараҿырпқәа  рконкурс ауп.  Шықәсырацәатәи аҭоурых иалагӡаны уи адунеи аҿы зегьы реиҳа зыхьӡ нагоу акакәны иҟалеит. Аконкурс аиҿкааҩ – Аҭыжьратә ҩны «Уотер Марк» ауп.

2021 шықәсазы имҩаԥысуа «Аԥараҿырпы еҵәаџьаа» алахәылацәа рхыԥхьаӡараҿы иҟоуп: ART MINT (Франциа), Венгертәи аԥараҿырԥыҟаҵарҭа, Италиатәи аԥараҿырпыҟаҵарҭа,  Австриа  Акралтә ԥараҿырпыҟаҵарҭа, Нидерландтәи Акралтә ԥараҿырпыҟаҵарҭа, Польшатәи  аԥараҿырпыҟаҵарҭа,  Парижтәи аԥараҿырпыҟаҵарҭа, Литватәи аԥараҿырпыҟаҵарҭа,   Бельгиатәи аԥараҿырпыҟаҵарҭа,  иара убас Канада Акралтә ԥараҿырпыҟаҵарҭа, Швеицариа Афедералтә ԥараҿырпыҟаҵарҭа, Алада-Африкатәи ԥараҿырпыҟаҵарҭа;Урыстәылатәи Афедерациа Абнк Хада, Латвиа Абанк, Изриль Абанк, Польша Абанк, Аԥсны Аҳәынҭқарра Амилаҭтә Банк, Венгриа Абанк Хада, уҳәа убас егьырҭгьы.

Аҟәа. Жьҭаарамза 14, 2021 шықәса. Аԥсныпресс. Аҟәа ақалақь аҩныҵҟатәи аусқәа Русбарҭа аҭҵаара аҟәша ахь атерроризм акт азы гәҭакыла иҟаҵаз имцырку адырра азы аматериалқәа неит, ҳәа иаанацҳауеит атәыла аҩныҵҟатәи аусқәа Рминистрра апресс-маҵзура.

Жьҭаарамза 13, 2021 шықәса, 13 сааҭи 00 минуҭи инарзынаԥшуа, Аԥсны аҩныҵҟатәи аусқәа Рминистрра аԥыԥшырҭа аҟәша ахь Аҟәа ақалақь Пушкин имҩаду ала аҩнеихагыла № 21 аҿы иҟоу Акоммерциатә Банк «Гарант-Банк» арҭҟәацга аҵоушәа ҭелла адырра ҟалеит. Зхаҭара шьақәыргыламыз аӡәы абанк амина аҵоуп ҳәа адырра ҟаиҵеит. Ахыбреи уи ааигәа-сигәеи имҩаԥгаз агәаҭарақәа рыла арҭҟәацга  шыҟамыз еилкаахеит. Иара убас Г. Арӡынба имҩаду ала игылоу аҩны №49, Аиааира Апроспект ала игылоу аҩны № 40 аҿы иҟоу «Гарант-Банк» егьырҭ иназыцҵоу аофисқәагьы рҿы агәаҭарақәа мҩаԥган.

Гәҭакыла имцырку адырра алазырҵәаз ахаҿы ишьақәыргылареи иԥшаареи ирызкны оператив-техникатәии аоператив-ԥшааратәи аусмҩаԥгатәқәа рымҩаԥгара иалҵшәаны, Аԥсны аҳәынҭқарратә шәарҭдара Амаҵзура, аҩныҵҟатәи аусқәа Рминистрра ашьаусԥшааратә Усбарҭа, иара убас Аҟәа ақалақь аҩныҵҟатәи аусқәа Русбарҭа ашьаусԥшааратә ҟәша русзуҩцәа  дааныркылеит 1981 шықәса рзы ииз Аԥсны атәылауаҩ Кәарацхьелиа Бесик Вальтер-иԥа. Кәрацхьелиа Бесик Вальтер-иԥа хаҭалатәи игәаҭареи иавтомашьнаҿы аимдареи раан азинхьчратә усбарҭақәа русзуҩцәа амобилтә ҭелқәа ҩба рыԥшааит. Азҵаара амҩаԥгараан Бесик Кәарацхьелиа абанк амина аҵоуп ҳәа ҭелла иҟаиҵаз адырра ахыхәмарра акәын ҵакыс иамаз ҳәа иҳәеит.

Аҟәа. Жьҭаарамза 14, 2021 шықәса. Аԥсныпресс. Жьҭаарамза 13, 2021 шықәса рзы Аҟәа ақалақь Апрокуратура  Ԥачлиа Ҳаџьараҭ Раули-иԥеи Гамгиа Руслан Шьалуа-иԥеи рганахьала Аԥсны Аҳәынҭқарра       Ашьаустә Закәанеидкыла ахәҭаҷ  320 ахәҭа 2 инақәыршәаны, змаҵуратә уалԥшьа назыгӡо амчра ахаҭарнак иганахьала агәабзиареи аԥсҭазаареи ашәарҭара иҭазыргыло амч ахархәара афакт ала аусеилыргара хацнаркит.  Апрокуратура аофициалтә саит иҟанаҵо адыррақәа рыла, иарбоу ацәгьоура ҟаҵан абарҭ аҭагылазаашьақәа раан:

Жьҭаарамза 12, 2021 шықәса рзы Аҟәа ақалақь аҿы, 16 сааҭи 30 минуҭи инарзынаԥшуа, апрофилактикатә усмҩаԥгатәқәа рымҩаԥгараан, Аҟәа ақалақь аҩныҵҟатәи аусқәа Русбарҭа ашьаусԥшааратә ҟәша аусзуҩцәа   Кәыдрытәи амҩаду ала ицон. Абжьаратәи ашкол №14 азаигәра урҭ рылаԥш иҵашәеит автомашьына  «Тайота-Альфард», уи аԥсҟы зкыз амҩатә ԥҟарақәа еилаганы, асветофор аҟаԥшь шакыз агәхьаа мкыкәа, ҩбаны инеиужьны инагоу ацәаҳәа дахысны дцеит. Ашьаусԥшааратә ҟәша аусзуҩцәа «Тайота» аԥсҟы зкыз Ԥачлиа Х.Р, амашьына иҭатәаз апассаџьыр Гамгиа Р.Ш. ааныркылеит. Амилициа аусзуҩцәа закәанла ишаԥу еиԥш амедицинатә гәаҭара ахысразы азы ирыдыргалаз ауснагӡа  Ԥачлиеи Гамгиеи мап ацәыркит, уи моу агрессиеи амч ахархәареи аадырԥшит.

Аҟәа. Жьҭаарамза 14, 2021 шықәса. Аԥсныпресс. Аԥсны агәабзиарахьчара аминистр Едуард Быҭәба Ареспубликатә хәышәтәырҭа аколлектив дрыдигалеит аҳақьым хада инапынҵақәа рынагӡаҩыс ҿыц иҟаҵоу Ерик Едуард-иԥа Ҳаҭхәа.

Аамҭала аҳақьым хада инапынҵақәа назыгӡоз Есма Маршьан лхатәгәаԥхарала иарбоу амаҵураҭыԥ аҟынтәи лхы дақәиҭтәуп.  Лара ҳазҭоу ашықәс мшаԥымза инаркны имаҵуратә зинмчы ахысра инамаданы аҳақьым хада  имаҵураҭыԥ аҟынтәи зхы иақәиҭтәыз Аполлон Гәыргәылиа ихаҭыԥан аус луан.

Агәабзиарахьчара Аминистрра ахада Есма Маршьан иналыгӡаз аусура азы иҭабуп ҳәа леиҳәеит.

Аҟәа. Жьҭаарамза 13, 2021 шықәса. Аԥсныпресс.  Имҩаԥысит Аслан Бжьаниеи Сергеи Шоигуи реиҿцәажәара

Аԥсны Аҳәынҭқарра Ахада Аслан Бжьаниа Москва иусуратә ныҟәарақәа раан имҩаԥысит Урыстәылатәи Афедерациа Атәылахьчара аминистр Сергеи Шоигу иареи реиҿцәажәара.

Аиԥылараан ирылацәажәеит атәылахьчареи ашәарҭадареи инарымаданы аԥсны-урыстәылатәи аусеицура иазку азҵаарақәа жәпакы. 

«Бзиала шәаабеит ҳәа шәасҳәоит, Аслан Гьаргь-иԥа! Ҳтәылақәа рырбџьар мчқәа ирыбжьоу аизыҟазаашьақәа зыда ԥсыхәа ыҟам адокументқәа рыла еиқәыршәоуп. Ҳара ҳзы аҵак ду амоуп Аԥсны Аҳәынҭқарра арбџьар мчқәа еибыҭаны, ихианы рыҟазаара. Аринахысгьы иаҭаху ахылаԥшра аҳҭалоит 7-тәи арратә база анапы иану аусқәа рынагӡара уи аҭышәынтәалареи ашәарҭадареи аиқәырхара зылшо акәны излаҟоу ала. Сара агәра ганы сыҟоуп арратә усхк аганахьала ҳтәылақәа русеицура азҵаарақәа иадымхалакәа, лыҵшәа аманы ишыӡбахало»,- ҳәа иҳәеит Сергеи Шоигу.

ПАРЛАМЕНТ-НАРОДНОЕ СОБРАНИЕ РА<br>Официальный сайт
АГЕНТСТВО ПРАВИТЕЛЬСТВЕННОЙ СВЯЗИ РА<br>Официальный сайт
АДМИНИСТРАЦИЯ ПРЕЗИДЕНТА РЕСПУБЛИКИ АБХАЗИЯ<br>Официальный сайт
МЧС РЕСПУБЛИКИ АБХАЗИЯ<br>Официальный сайт
КАБИНЕТ МИНИСТРОВ РЕСПУБЛИКИ АБХАЗИЯ<br>Официальный сайт
МИНЗДРАВ РЕСПУБЛИКИ АБХАЗИЯ<br>Официальный сайт
МИНИСТЕРСТВО ИНОСТРАННЫХ ДЕЛ РЕСПУБЛИКИ АБХАЗИЯ<br>Официальный сайт
ГЕНЕРАЛЬНАЯ ПРОКУРАТУРА РЕСПУБЛИКИ АБХАЗИЯ<br>Официальный сайт
АКАДЕМИЯ НАУК АБХАЗИИ ГОСУДАРСТВЕННОЕ НАУЧНОЕ УЧРЕЖДЕНИЕ «СУХУМСКИЙ ФИЗИКО – ТЕХНИЧЕСКИЙ ИНСТИТУТ»
СУХУМ<br>Официальный сайт
МВД РЕСПУБЛИКИ АБХАЗИЯ<br>Официальный сайт
AUSURA.SU<br>Биржа труда
Яндекс.Метрика

Login to your account

Username *
Password *
Remember Me